Þorláksmessa

Sem betur fer höfum við misst af Þorláksmessuhátíðinni undanfarin ár.  Höfum oftar en ekki verið hinum megin á hnettinum.  Segi þetta vegna þess að þessi dagur er sennilega sá dagur sem stressið er mest.  Vaknað seint og þurfti að fá mér skötu til að bjarga deginum.  Endaði síðan í Múlakaffi og fékk mér eina vel kæsta.  Til að poppa þetta aðeins upp þá bragðbætti ég skötuna með rauðbeðum og grænum baunum.  Skóflaði þessu svo í mig og hneykslaði með því í leiðinni nokkra eðal-Vestfirðinga við borðið.  Vestfirðingurinn fór síðan að tala um fólk, sem borðaði skötu bara til að sýnast og að sjálfsögðu tók ég það sem skot á mig.  Annars finnst mér vel kæst skata og tindabikkja vera herramannsmatur, en lyktin er að sjálfsögðu ógeðsleg.  Svo er auðvitað fróðlegt að hlusta á þessa gömlu Vestfirðinga tala um verkun skötu og hákarls.   Maður þarf ekki að hafa eyrun lengi spert til að fá algert ógeð á þessum afurðum.  Eftir að skötuveislunni lauk fórum við svo í verslunarleiðangur og keyptum ýmislegt.  Kl.  4.00 fórum við svo heim enda ætlaði ég að horfa á El-Gran-Clasico (Barcelona-Real Madrid).

Því miður þróaðist leikurinn ekki eins og ég hefði viljað.  Horfði því miður á leikinn einn, en það er því miður ekki eins skemmtilegt.  Flestir fjölmiðlar á Spáni og á Íslandi höfðu spáð því að léttfeitur (Eiður Smári) myndi fá að byrja leikinn, en Rijkaard þorði ekki að taka áhættuna að setja Ronaldinho út úr liðinu aftur.  Smárinn hefur átt mjög góða leiki að  undanförnu, meðan Ronaldinho hefur vermt bekkinn.  Held að liðið spili mun hraðara með þá Eið og Messi, því Ronaldinho vill hanga og mikið á boltanum.  Svo vantaði auðvitað Messi, Henry og Eið.  Real átti sigurinn svo sannarlega skilið og léku virkilega vel saman.

Um kvöldið var svo haldið í annan verslunarleiðangur.  Meðal annars farið í miðbæinn og Kringluna með Bubba Morteins í eyrunum, en útvarpað var frá árlegum Þorláksmessutónleikum hans á Bylgjunni.  Það var mjög kalt í bænum og bæjarferðin stóð varla meira en hálftíma, en síðan var keyrt upp í Kringlu.  Svo er alltaf gaman að enda daginn með því að hlusta á jólakveðjurnar á Rás 1 og hlusta á gömlu vínilplöturnar.  Þs gömlu væmnu jólalögin.  

Í gamla daga var Þorláksmessa dagurinn sem maður fékk sér í staupinu, en sem betur fer er partíið búið.

Athugasemdir

[arnar valgeirsson, 24.12.2007 kl. 15:05]

blessaður, partýið er rétt að byrja. gleðileg jól

[Gunnar Freyr Rúnarsson, 25.12.2007 kl. 01:30]

 hætta öllu partístandi og bæta sig í skákinni